係咪得我一個00後唔識整頓職場？
朝早7點20分，你喺張床起身
9秒9換好套充滿住摺痕嘅恤衫同牛仔褲
搭7點半嘅地鐵去中環返銀行嘅 Graduate Trainee
喺連鎖嘅茶記上面食60蚊嘅沙牛
8點59分，啱啱好趕得切打卡
「你睇啲00後，成日都最後一秒先返到，有冇搞錯」
old seafood同一番說話仲準時過鬧鐘，每日都會講一次
"其實早到係早到，唔係準時囉"
你好想咁同佢講咁，但又驚得罪人
好在都係忍多佢兩日
1點終於放飯，你想試吓附近有間新開嘅餐廳
但係諗到食飯得1個鐘，行過去10分鐘，返黎10分鐘，如果要等位又10分鐘，遲到又畀人鬧
最後你又去返樓下轉右就到個間30蚊嘅兩餸飯
「番茄炒蛋，京都骨」
「飲咩野」
「凍奶茶」
「凍飲加三蚊」
「咁....熱奶茶啦唔該」熱飲養生啊，最緊要養住個荷包
夜晚7點，你都唔知點解你要OT
可能因為你個 supervisor 5點45又突然搵你開會
度咗兩個鐘嘅 project detail，唔經唔覺9點先收工
夜繽紛都得返今日晏晝個間兩餸飯仲開緊
返到屋企，食完飯沖埋涼都就12點
你喺張隻腳掂到牆邊嘅單人床瞓，諗住聽朝就返去遞信
但係你自己都知你唔會遞，因為你喺一個 fresh grad，要一份工
第二朝7點20分，你又喺張床起身
又搭7點半嘅地鐵，又喺8點59分打卡
又面無表情咁聽住同一個 old seafood 講廢話
又食兩餸飯，又係飲熱奶茶，又OT到9點
又12點，每日嘅時間好似開咗兩倍速咁
但係今次你知聽日唔一樣
因為聽日喺星期六
朝早7點20分，你好似平時咁起身
揹住大學同朋友行山買落嘅 Naturehike 摺疊背囊
搭7點半嘅地鐵，食60蚊嘅沙牛
不過，今日你可以慢慢食到9點半
之後再慢慢行舊山頂道去山頂食 burger king
「One whooper pls」
中午1點，你喺香港唯一一間 burger king 慢慢享受緊你嘅漢堡
食到兩點半先揹返個背囊開始你嘅港島徑瀑布之旅
去到港島徑第三段
你攞起部菲林相機不停咁對住個瀑布仔影相
因為你知道，過多一日你就要重回現實
過多一日你就要重新過多5日重覆嘅返工生活
過多一日你就要重新聽多5日old seafood 嘅說話
過多一日你就要重新食多5日一模一樣嘅兩餸飯
過多一日你就要重新捱多5日 OT 到9點嘅夜晚
過多一日你就要阻止多5日返去遞信嘅念頭
但係好在，今日未過
起碼依家你仲可以睇呢個日落
去到夜晚，你諗不如下個禮拜六朝早去川龍飲茶
雖然你知道過多一日你又要返工
但你亦都知道，五日後永遠都有另一個夕陽等緊你
